| |  |  | |
Sobre
o autor
Benvidos
ao meu curruncho no ciberespacio. O autor deste sitio sobre Pena Trevinca chámase
Anxo Abelaira. A miña conexión con Trevinca ven de neno, nos invernos
da miña aldea en Valdeorras, desde onde se ven as neves de Trevinca. Subín
moitas veces á serra, e coñezo ben a montaña desde Fonte
da Cova á Serra Segundeira e o val do Tera.
Aprendín a esquiar
ben cedo en Manzaneda,
onde os meus pais foran un dos primeiros propietarios na estación. Gardo
na memoria aquelas noites de inverno que durmimos en colchóns de espuma,
cando os apartamentos aínda estaban en obras e había moita neve
e pouca xente na estación.
Estudei na Coruña e en Brest,
Francia, e déronme un diploma que di que son técnico en empresas
turísticas. Ao rematar os meus estudos marchei ao extranxeiro e os meus
primeiros anos de experiencia profisional foron en estacións de esquí.
Empecei como pisteiro e responsable dun stand de información turística
na Serra da Estrela,
Portugal; traballei sobre un proxecto de re-estruturación e marketing do
Pic du Midi (2877m)
na estación de La
Mongie-Tourmalet, Pirineus franceses; introducín a comercialización
no mercado español da estación de Les
Orres, Alpes franceses; e finalmente retireime da industria cunha moi festiva
tempada nunha tenda de aluguer de esquí en Söll-SkiWelt,
Tirol, Austria, onde descubrín o pracer do snowboard en neve fresca.
Vai
xa para dez anos que deixei de traballar en estacións de esquí e
quedei a vivir en Escocia, país montañoso e de extensos espazos
naturais. Coñezo como a miña casa as seis estacións
escocesas e tamén un bon número de estacións de variadas
características por toda a Europa. Sempre tiven preferencia por esquiar
en estacións de esquí de pequena talla, se cadra porque me traen
á memoria aqueles primeiros anos de Manzaneda. Por suposto, desfruto igualmente
os vastos dominios esquiables alpinos -o meu favorito é a Vallée
Blanche no glaciar de Chamonix
Mont-Blanc- mais moitos dos meus mellores días de esquí paseinos
en descoñecidos tesouros como Roundhill
en Nova Zelanda ou Sveitsin
en Finlandia.
Vivo en Bruxelas desde o ano 2004, onde traballo como consultor
freelance en avaliación de proxectos e adico o meu tempo libre á
miña familia, amigos, e a escribir sobre variados temas que publico principalmente
en media do Reino Unido e Escandinavia. Pese á distancia, sempre vin de
seguir a evolución da industria do esquí e, en particular, do relacionado
co esquí galego. Foi así que no ano 1999 publiquei un artigo na
revista Ski Area Management
dando conta das posibilidades dunha estación invernal na serra de Trevinca,
e que desde finais do 2004 manteño na rede este espazo www.trevinca.info.
A opinión que dou neste website foi publicada en Galicia polos xornais
La
Voz de Galicia (1,
2,
3,
4),
Xornal.com
(1, 2),
e A
Nosa Terra (1,
2,
3).
Espero
que encontres de interese e mesmo de uso as informacións deste sitio web.
Anímote a que participes da discusión nos foros
de Trevinca. Se precisas contactar comigo ao respecto deste website, poderás
encontrarme en largslargs@talktalk.net
|
